Gazteok emantzipatzeko ditugun zailtasunen aurrean (alokairu burbuila, diru sarrera finkorik ez, etxebizitza eredu urriak) bestelako ereduak ere aztertu beharra dago. Emantzipatzeko ohiko ereduak ez dute ahalbidetzen bizitza-proiektu autonomoa abiatzea. Izan ere, gazteon egoerari eta bizitzako fase desberdinei moldatu beharrean, familia eredu tradizionalaren beharrei erantzuten diete. Bestelako ereduak aztertzeko, gazteon beharretara egokitzen diren ala ez ikusteko eta Euskadin martxan jarri direnak gertuagotik ezagutzeko ‘Milaka elkarbizitza’ Hiruburua ―gazteak, kargu politikoak eta teknikoak gai zehatz bat jorratzeko mahai baten inguruan elkartuko dituen eztabaida-dinamika― antolatu genuen pasa den azaroaren 7an Udaleko Donostia Gazteriarekin elkarlanean eta Eusko Jaurlaritzaren laguntzarekin. Gainera, Txirikorda proiektuko kideak izan genituen emantzipatzeko jarraitu duten belaunaldi arteko elkarbizitza esperientzia gurekin banatzeko. Jarraian dituzu #MilakaElkarbizitza Hiruburuko argazkiak, baita egin genuen unean uneko jarraipena.
- Lehenik, bertaratuok egun gazteok etxebizitzarekin dugun harremanaren diagnosia garatuko dugu eta Txirikorda proiektua azalduko digute Usurbilgo alkateak eta Hiritik At kooperatibako kideek.
- Ostean, World Café bitartez hiru ardatz landuko ditugu: Donostiako Udalaren neurriak, belaunaldi arteko eredua eta Donostiarako proposamen baten sorrera.
Proiektu honi buruz edo etxebizitza lan-arlotik egiten dugunari buruz gehiago jakin nahi baduzu idatzi etxebizitza@egk.eus helbidera edo deitu 944436143 (Luisa) zenbakira.
