Urtarrilean aurkeztu genuen Etikasi programaren barnean 2019ko ekainean Auschwitzera egindako bidaia hezitzaileen argazkiak dituzu jarraian. Zumaiako Zumaiena ikastetxeko Batxilerreko lehen mailako ikasleekin Auschwitz I Main Camp eta Auschwitz II Birkenau kontzentrazio esparruak eta Cracovia hiriko auzo eta ghetto judua bisitatu genituen. Helburua bertan gertatutakoa lehen eskutik ikustea zen, liburuetan ikasitakoari esperientzia gehitu eta etika eta giza eskubideez hausnartzeko.
Guretzat egun oso bereziak izan dira bai ikusi dugun guztiagatik baita horri esker dinamiketan sortu diren hausnarketengatik. Aurrez, proiektua diseinatzean, oso argi genuen Etikasin egingo diren bidaia hezitzaileak oso baliagarriak izango direla. Bost egun hauen ostean jada ez dugu inolako zalantzarik eta, gainera, gure lan-ildoa baieztatu eta sendotu duen lehen esperientzia dugu.
Albiste honetan bost egun horietan egindakoaren laburpena egin genizuen duela egun batzuk. Zumaienako Batxilerreko lehen mailako ikasleen esperientzia eta iritzia biltzeko bi bideo (bat eta bi) ere egin genituen, hori baita bidaiaren eta proiektuaren ebaluaziorik onena: eurek ikusi eta ikasitako guztia, Auschwitzera egindako bost eguneko bidaietik eta bertako esperientziatik eramaten duten guztia.
Bidaia hezitzaileei buruz, Etikasi programari buruz edo Euskadiko Gazteriaren Kontseiluko (EGK) bake eta bizikidetza lan-arloan egiten dugunari buruz gehiago jakin nahi baduzu, ez izan zalantzarik eta idatzi bakea@egk.eus helbide elektronikora edo deitu 943 42 97 67 telefono zenbakira.
