Soldata Arrakalarekin amaitzea aldarrikatzen dugu. Reivindicamos terminar con la brecha salarial - Euskadiko Gazteriaren Kontseilua (EGK)

Soldata Arrakalarekin amaitzea aldarrikatzen dugu

  • 2018an EAEko emakume gazte batek gizonezko batek baino 223€ gutxiago kobratu zituen hilean

  • Gaur, otsailak 22, Emakume eta Gizonen Soldata Berdintasunaren aldeko Europako eguna da. Araudiek babestu arren, hainbat oztopo daude

Emakumeen lan merkaturatzea eman bada ere eta jarduera-tasan gizonezkoekiko  ezberdintasuna txikitu bada ere, ukaezina da ez dela berdintasun erreala erdietsi. Horregatik Euskadiko Gazteriaren Kontseilutik (EGK) eta 6 elkartetatik* Emakume eta Gizonen Soldata Berdintasunaren aldeko Europako egunaren harira kargu eta ofizio bera betetzen duten pertsona guztiei berdin ordaintzea aldarrikatzen dugu, emankumeen, gizonen eta genero bitarrekoak ez diren pertsonen artean bereizketarik egin gabe.

Emakume eta gizonen arteko berdintasun erreala dugu jomuga eta, horregatik, azken urteotan hainbat ekimen garatu ditugu, besteak beste, Ibilbide Moreak txostenean bildutakoak. Emakume gazteek lan munduan bizitako egoera eta esperientziak lehen eskutik ezagutu genituen. Ordutik, Gazteen Euskal Behatokiak plazaratutako datuek erakusten duten argazkia eraldatzeko lanean jarraitu dugu.

Emakumeak Gizonak
Batez besteko soldata 1.212€ (18-34 urte) 1.336€ (18-34 urte)
Lan orduak 33 astean 39 astean
Behin-behineko kontratuak %70,2 %66,2
Lanaldi partziala %39,6 %22,1

Aldarrikapen eta eskariak

Aipatutako printzipioa Europar Batasunaren oinarrizkoetako bat da eta hainbat araudik babesten dute. Hala ere, berdintasun erreal horren kontra egiten duten hainbat oztopo daude, horien artean; soldata arrakala. Taulak argi uzten duen bezala, 2018an EAEko emakume gazte batek gizonezko batek baino 223€ gutxiago kobratzen zituen hilean. Hori dela-eta, 7 elkarteek manifestuan hainbat eskari bildu ditugu, besteak beste:

  • Genero ikuspegia txertatzea: gazteon enplegura bideratutako politika publikoetan ezinbestekoa da. Soilik horrela amaituko da lan-munduan agintzen duen sistema heteropatriarkalari loturiko bestelako diskriminazioekin.
  • Sexuka banatutako datu eguneratuak: Beijingeko Nazioarteko Emakumeen konferentzian aldarrikatu zen 1995ean, baina ez da erdietsi oraindik. INEn horrelako datuak egon arren hauek ez daude segregatuak EAE mailan.
  • Zigorrak berdintasun eza egoerekin amaitzeko: enpresa pribatu zein publikoei zigor gogorragoak jartzea soldata arrakala ezabatzeko, baita lan berdina egiteagatik soldata berdina jasotzearen garrantziaren gaineko kontzientziazioa handitzea.
  • Berdintasun Planak bultzatzea: enpresa eta zerbitzu ezberdinetan garatzea eta bertan ezartzen diren neurriak paperean geratzen ez direla bermatzeko ikuskaritza eta neurriak ezartzea.

[PDF] Otsailak 22, emakume eta gizonen arteko soldata berdintasunaren aldeko Europako eguna

Dokumentu honek gazteen artean ematen den soldata arrakalan zentratzen da, errealitatea eta hau ematearen arrazoiak azaleratuz (lan kontratu ezberdinak, batez besteko soldata, lan ordainduan ematen diren ordu kopurua, diskriminazio horizontala eta bertikala…).

Gehiago jakin nahi baduzu edo zure proposamenak helarazi nahi badituzu, idatzi berdintasuna@egk.eus / bizibaldintzak@egk.eus  helbideetara edo deitu 944436143 / 615749929 (Irati) edo 945220601 / 688737153 (Oihana) zenbakietara.

*Honako 7 elkarteak atxiki dira dokumentura: CCOO Gazteak, EKO-ACG, Gazte Abertzaleak, Euzko Gaztedi EGI, LSB-USO, Aldarte eta Rebeldía.

Iruzkin bat

Zure e-posta ez da argitaratuko. * Eremuak ezin du hutsik egon .

This site uses Akismet to reduce spam. Learn how your comment data is processed.