Gazteriaren ahalduntzea ezinbestekoa da oraingo eta etorkizuneko bizikidetza ereduaren protagonista eta eragile izateko. Horregatik, beharrezkoa da hezkuntza-tresnak sortzea eta gizarte- eta hezkuntza-arloko elkarrekintzak indartzea, bizikidetzaren esparruan gainditzeke dauden eta sortzen ari diren erronken aurrean.
Testuinguru horren aurrean Etikasi programa garatzen du Euskadiko Gazteriaren Kontseiluak (EGK) Giza Eskubideen eta Biktimen Atentzioaren Zuzendaritzarekin (Justizia eta Giza Eskubideen Sailera atxikituta) eta Gazteria eta Emantzipazio Zuzendaritzarekin (Ongizate, Gazteria eta Erronka Demografikoaren Sailera atxikituta) batera.
Programaren helburua
Etikasi giza eskubideetan sostengatutako hezkuntza-proiektua da. Giza duintasunean oinarritua eta bakearekiko, aniztasunarekiko eta elkartasunarekiko konpromisora bideratua dagoena; hots, enpatiaren aldeko hautua egiten du. Programaren helburua etikari (etika ikasi) eta giza eskubideei buruz ikastea da, Auschwitzera (Polonia) egindako bisita hezitzailearen bidez. Leku horretan motibazio politikoko indarkeriak markatutako giza eskubideen urraketak gertatu dira, eta bizikidetza erronka gisa ulertzen da, bai tokiko mailan zein maila globalean.
Giza eskubideetan oinarritutako hezkuntzaren ikuspuntutik, zuzenean eta pertsonalki leku horietan egoteak eta jazotako gertakizunak ezagutzeak potentzial pedagogiko handia eta iraunkorra dauka: mundua beste begirada batetik ikustea eta beste pertsonen lekuan jartzeko aukera ematen du. Horregatik, Etikasi hezkuntza-esperientzia eraldatzaile gisa ulertzen dugu, giza duintasunean eta giza eskubideetan oinarritutako bidaia hezitzaile baten bidez garatzen dena.
Parte hartzeko baldintzak
Euskadi barnekoak diren ikastetxeetakoak diren Batxilergoko 1. mailako ikasgelak aurkeztu ahalko dira (gehienez, 30 ikasle). Ikastetxe bakoitzak, gehienez, hiru eskaera aurkeztu ahal izango ditu deialdira (deialdian eskolako hiru ikasgelek parte hartu dezakete) eta bi irakasleekin batera joango da ikasgela bidaietara.
Parte hartzeko, hurrengo pausoak jarraitu behar dira:
- Izen emate orria bete. Izen-ematea ikasgelako tutoreak egin beharko du.
- Bideo bat aurkeztu. Giza eskubideen gaia lantzen duen bideo bat egin beharko da. Bideoak proposatutako gaiarekin lotutako alderdiak aurkeztu eta horien gainean hausnartu beharko du. Bideoak gehienez 4 minutuko iraupena izan behar du. Edozein gailu elektroniko erabili ahalko da (argazki-kamera, bideokamera, mugikorra…), betiere bideoaren kalitatea bermatzen bada. Hainbat generotako bideoak onartuko dira: muntaketa fotografikoak, gidoi teatralizatuak, dokumentalak, ilustrazio animatuak, ikus-entzunezko poemak, kronikak, etab. Behin bideoa eginda dagoenean, fitxa hau bete beharko da eta bakea@egk.eus helbidera bidali.
- Bideoaren inguruko idatzizko taldearen hausnarketa egin: zergatik aukeratu den gaia, nola izan den sormen prozesua, nola landu den gaia, erabakiak hartzeko modua, adostasunak eta desadostasunak kudeatzeko modua, ikasle eta irakaslearen rola… gehienez bi orrialde.
Hautaketa prozesua
Deialdiko oinarrietan ezarritako baldintza guztiak betetzen dituzten bideoak ondorengo balorazio-irizpideak kontuan izanda ebaluatuko dira:
- Originaltasuna eta sormena (2 puntu)
- GGEEak modu zuzenean lantzea (1,5 puntu)
- Protagonistak gazteak izatea (1,5 puntu)
- Genero ikuspegia izatea (1,5 puntu)
- Hizkuntza eta Kultura aniztasuna (1,5 puntu)
- Kalitate teknikoa (1 puntu)
- Idatzizko hausnarketa (1 puntu)
- EGK-k antolatutako jardueraren batean edo giza eskubideekin edo memoriarekin zerikusia duen programa, jardunaldi eta abarren batean (adibidez, Adi-Adian) parte hartu duten eskolek 0,5 puntu gehigarri lortuko dituzte.
Epaimahaia Hezkuntza, Giza Eskubide eta Kultura arloetako pertsona ezagunez osatua egongo da, baita EGK-ko talde teknikoa ere. Epaimahaiak eskumena izango du deialdiaren baldintzak betetzen ez dituzten eskaerak baztertzeko edo deskalifikatzeko.
Data garrantzitsuak
Hauek dira hautaketa prozesuko epeak:
Izen-ematea: urtarrilak 26 – martxoak 13
Bideoaren bidalketa epea: martxoak 13 (23:59)
Ebazpena: apirilak 13
Bidaien aurreko formakuntza: maiatza-ekaina
Poloniara bidaia: ekainak 13-16
Itxiera saioa: iraila
Hautatze-prozesua amaitzen denean Euskadiko Gazteriaren Kontseiluak (EGK) ebazpena komunikatuko die parte hartzaile guztiei.
Parte-hartzearen onarpenak bidaia aurretik izango den 6 orduko formakuntza ezinbestean egitea dakar. Bidaiaren ostean bigarren lan bat egin beharko da bisitatu den leku europarrean eta Euskadin gertatutakoaren memoria kritikoek komunean dituzten elementuak identifikatzeko. Horrez gain, zentroaren zuzendaritzarekin eta tutoreekin bilera bat egingo da, baita gurasoekin ere, ikastetxeak hala nahi izanez gero.
Etikasi programan parte hartzeko hautatua izan den ikasgelak ebazpena jakinarazten denetik 10 egun naturaleko epea izango dute, gehienez, euren parte-hartzea berresteko.
Gastu guztiak EGK-k ordainduko ditu (hegaldia, bidaia asegurua, ostatua, dietak…).
Zalantzarik izanez gero, edota informazio gehiago jakin nahi baduzu, deitu edo bidali WhatsApp bat 688 737 097 / 943 42 97 67 telefonora (Mónica) edota idatzi bakea@egk.eus helbidera.